روس یوکرین بحران حل کرنے میں ناکام رہا تو مزید پابندیاں لگائیں گے: جی سیون ممالک

(ایجنسیز)

ترقی یافتہ ممالک کی تنظیم گروپ سیون نے اعلان کیا ہے کہ اگر روس یوکرین کا بحران حل کرنے میں ناکام رہا تو اس کے خلاف پابندیاں سخت کردی جائیں گی۔

جی سیون کے رکن ممالک کا سربراہ اجلاس ہالینڈ کے شہر دی ہیگ میں ہوا۔ اجلاس کے بعد جاری بیان میں کہا گیا ہے کہ روس کی جانب سے یوکرین کی خودمختاری اور جغرافیائی وحدت



کی خلاف ورزی پر جی سیون تنظیم اس پر کئی پابندیاں عائد کرچکی ہے ۔ اگر روس نے یوکرین کو غیر مستحکم کرنے کا سلسلہ جاری رکھا تو اس کے خلاف مربوط شعبہ جاتی پابندیوں سمیت مزید پابندیاں لگائی جائیں گی جن کے روسی معیشت پر نمایاں اثرات مرتب ہوں گے۔

دوسری جانب روسی وزیر خارجہ سرگئی لیوروف کا کہنا ہے کہ جی سیون ممالک کے اس اقدام سے روس کو زیادہ فرق نہیں پڑے گا۔